प्रेम रस इक्किसी

।। प्रेम रस इक्किसी हरी सार प्रभात ।।

अवल आसरो ऐक है,कवल सखावण काज ।नकल हर नित निहारिये ,सकल सार सिरताज ।(१)

परम रहे नित पनपतो ,निज शर्म रखण नेह।धर्म चुकां धिन हटसी ,कर्म सुधार करेह (२)

मनवा नर हरि माणलै ,परवर प्रेम परिवार।जर जर कर मत जीवनी ,सरवर अम्ब संसार ।(३)

तर तर तो गत तमस से ,वर हर सर विश्वास ।सुर पुर साधण सायबी ,तड़ फड़ मत तूं त्रास ।(४)

कुलखण छोडण कवल कर ,विलसण हर विश्वास ।अनुसरण तूं आत्मा  ,परसण श्री मन पास ।(५)

कर्म श्रम करुणा करो ,धर्म शरण धजवाय ।मर्म ओळखण रै मनां ,चर्म सुख मत चळकाय ।(६)

खर गत को तु खदेड दे ,जर जड़ जीव जंजाळ।हर सुर हरखण हथ करो ,कर छड दिय तुं काळ ।(७)

नाळ प्रेम हरि नीसरो ,पाळ श्री  पहुंचाण ।काळ उजाळण काम को ,निरताळ सख निसाण ।(८)

चोट करे नह चिळकणो ,खोट मनां खंखाळ ।परमार्थ रथ पनपतो ,पुनः री बांधो पाळ।(९)

जीव दया तुं जाचलै ,दिलां उतारण दंभ ।तामस कर किम ताड तो ,खड़ो किम अड़ी खंभ ।(१०)

भूल काळ की भाळ लै ,कौरव रावण कंस ।दानवता मन ढह गया ,उजाड़ अपणो अंस ।(११)

समझ समझ तूं साच नां ,अण समझ मत उजाड़।अवस मरणो ज ऐक दिन ,वर मत विरध विगाड़ ।(१२)

चाड़ न चंडाळ चोकड़ो ,ठग रा  घोड़ा ठांभ ।तामस भर नह ताडणो ,खोटा लखसण खांभ ।(१३)

राम गुणां में राज तूं ,मरियादा महमाण ।आदर कर ले असल रो ,जीवन गत को जाण ।(१४)

आंबा जग जाळ अबखो ,लांबा हथ लोहार ।झूबां हरी री झल तूं ,वीठल वाट बुहार ।(१५)

गुरु ज्ञान को गोत लै ,शुरु सवेली सोच ।अरि भाळक्यां अटकसी ,मिरु  काढ एह मोच ।(१६)

सिणगार कर तुं श्री तणो ,सोही लेसी सार ।साख परख तुं सायब की ,तो है तारण तार ।(१७)

वसुओं रख व्यवहार को ,पढ परमार्थ पाठ ।गौ पाळण श्री गंजसी ,ठावा ठाकर ठाठ ।(१८)

वाट वीठल कर वसवीं ,गौ पूजा गुणगान ।गिरधर तहां हि गंजतो ,धर गौ रिक्षा ध्यान ।(१)

निरख उथिये नारायणी ,जन्मी गौ सुख गांम ।आयल विरवड़ आवड़ा ,नवधा करणी नाम ।(२०)

सूरा सुर हरी साखिया ,असल इक्कीसी अम्ब ।अवस ईश्वर औळखौ ,जीव दया जगथम्ब ।(२१)

आम्बदान जवाहरदान देवल आलमसर